مدخل:
مع كل نبضة العمر بقصر
والمسافات والأماني
مع كل نسمة القلب بتمدد
بيرهق أو بعاني
ثواني تفرق في عمرنا
ليلنا أطول من مقاطع غنية بتهودن تداري
والجرح لسة
وهل ترتق الجرح الأغاني؟
نص:
اصلو ما كان احتمال انسان معتق بالخطايا
وأندهش اني مجدوع في زقاق الخيبة
ناصية ذكريات
وأنا نفسي كان في حتة جمبك
أو ضفيرة تضوي ليل الأمنيات
تحكيلي كيف أصبحنا كيف أمسيتي
كيف قيلنا كيف تاتيتي طفل الأغنيات
وفرشتي روحي علي الزمان العدا فات
شفتيني بين حافة ضريح البوح
وبين لحظة صراخ صمتي المسمى سكات
سكًتي نبض السكة
لحنتي الرهاب في غنية
هديتي روح التضحيات
والروح وباقي الشوق
والرؤية لو بتحوق
المح طريق الرجعة قبال الفوات
لو كان حصل
ما كنت ضيعتي القوافي
الفي خيالي بتهزم اشباح المسافات
شفتيها كيف منسابة ترتاح الكمنجات
يوم تقاطع نظرة منك
نوتة في سلم سباعي
ونبقى في الشك والخيالات
نستبيح صمت الليالي ونستجم
ما بين ملامحك والنجيمات
لو صدق نبضي و لقيتك
بزرع الحب في الغمامات
يا ضايعة من بدت الخليقة
وضاع معاك نبض الزمن
الشوق وأعراضو الغريبة
استهلك الروح والبدن
واهو كل ما ضاقت مساحة البوح
زادت مساحات الغنا البشرح تفاصيل المحن
تفصيل ملامحك في ابتسامة
تفصيل خطاويك كالغمامة
الراحلة في ليل الشجن
شالت ملامح السكة
من ضي إبتسامتك
وشحتفت في روحي ظن
ظنيتك الغنية البتبرا
الجرح لامن يندمل
ظنيتك الريد البيهدي
القمري قوقاي الزمن
ظنيتك العود البيهدي الغنية
شوفتك لو يرن
ظنيتي انت اكون براي في الأرض دي
وأهديك نص كل ما أحن
ومالو لو كان حسن ظنك فيني اجتاز
خيبة اماني القيا من كم عام مضى
مالو لو كان انفعالك عكس تيار الحقيقة
الفارضة هيبتا في المدى
مالو لو تجمعنا صدفة
علي اقاصي الصحرا نقتسم الصدى
ومن دهشتك يتولد جواي نهر
ويترسم فيك الندى
مالو لو القاك
تفاجئي الماضي بي الحاضر
ترتبي هذه الفوضى
تقايضي الشوق ب طورية
وتحرثي الأرض شان تخضر
ويقوم القمح بيناتنا
وتتكون ملامح لونك الأسمر
تلملمي روحي في ثغرك
وتضحكي روحي تتبخر
وناديتك تعالي علي
وأطلعي فوق
وغني مع الاماني رفيق
يروح نبضي و يشابيلك
مزمايرك بتطفي حريق
قريب منك مسافة أفقدك
والقاك بتضوي بريق
لقيت صوتي البناديلك شحيح
قلت اهديك وزن أول
لو عنادك يستريح
إلا هذا الوزن طول
في الدواخل نص جريح
جميل جدا
ردحذف