من كل شارع و ضحكة أبسط ما يكون
من كل شافع و سكة تحباهو و يمش
من كل رحلة على جنون النيل سكون
من كل هبوب و النخل صامد ومرتعش
من كل كمنجة دموعا ما لاقن عيون
من كل عاشق و صدرو بالشوق منكمش
من كل دا
أنا اصلي ما لقيتك معاي
وانا راضي من دونك أمش
النهر أقرب ؟
ولا نمشي علي المسافات اللي مافي؟
السكة أبعد من خيالات المسافرين بالمرافي
الشوق بينده ليك تعالي
الدرب بيناتنا أستقام
لاكنه مقطوع في الوسط
في نقطة
سامع فيها نبضات الحبيبة
وإختفت فيها القوافي
وأنا
أنا ايه ذنبي لو كل الدروب الجاية منك
جاية بي شارع موازي
أنا ايه ذنبي لو كل المسارات و الطرق
بيناتنا ما كانت مسفلتة للأسف
و للأسف
كل النصوص البينا ما كانت فرح
و انا بعتذر
عن كل خطوة مشيتا في درب العدم
عن كل نبضة خوف وراك
استهلكت من روحي دم
عن كل نقطة حبر عرفت
معني تفريغ الدواخل
وفارقت جوف القلم
وانا يا حبيبة
تعبت من كونك قريبة وما معاي
وتعبت من انه القوافي بتشبهك
مع انه ياني القلت ليك
أهديني من عينيك مسافة بتشبهك شان أوصلك
ما كان قصدي تهديني الرهاب
وأنا كل جراحي بتنزفك
ولحظة الجرح إستباحك من دماي
ما كنت قاصد أفقدك
أو أرتق الجرح البينزف مني
وأقفل سكتك
ما دي المشاوير البدونك
كل يوم ياهو الأمس
وهدي الصباحات دون عيونك
ليل مباغتاهُ الشمس
او كل ما غابت بلاك
في القلب تشرق صورة ليك
وتضوي ليل من وجعتك
وأنا
أنا بس بدونك بهوي في روحي الصمود
وبلولي أطفال الحجار بي قصتك
لو مرة طلعت من ضفايرك شيبة تهتف بالظروف
الظروف الروحت من دربي مشرع بسمتك
ما كان كتبتك رمز في جوف القصايد
او رفعتك بعد خامس و احتملتك
إحتملتك انت تكوين الأماني
يوم لقيتك
إستويتي علي ضفاف القلب
وغازلتي الرمال بي خصلتك
معناه انه
النهر أقرب والرمال
ترتاح علي طول المسافات في توازي
الموج بهابش الرملة
دون ما يوصل الجوف الفيهو ترتاحي انت
مع انه بعدك ماهو بالبعد الخرافي
وانت بتخافي الرياح
والقيفة والموج والمرافي
وكل لحن علي ضفاف اليابسة
لو هابش رموشك
الف نسمة من الشمال
توصل مسام القلب وتجتاز الطوابي
وبس لأنك كنت غيمة
وكنت بتبخر عشانك
كنت ترحلي من بلادي
وديمة تهطلي في المنافي
WOW❤
ردحذف